Aanstaondje zaoterdig 11 december presentere wae uch vanoet La Rochelle ‘De Slumste Sjansemaeker’. Zoea-as op aafgeloupe waek gecommuniceerdj kèntj gae via www.sjansemaekers.nl kieke waem De Slumste Sjansemaeker geit waere. Wae beginne óm 20.00 oor dus zorg det gae op tied ingesjakeldj zeetj!

Óm uch in de sjtumming te laote kome en te laote ruuke aan de vraoge die de kandidate kènne verwachte, kome wae dees waek edere daag bie uch mèt vraoge oet ’n rönj die ouch in De Slumste Sjansemaeker gespeeldj geit waere. En dit is neet väör spek en boeane! Gae kèntj eur kènnis van de Sjansemaekers, de vastelaovendj in ’t algemein of ós leef klein aardig dörpke toeane door de antjwaorde op dees vraoge in te steure en mèt te dinge nao dieke prieze en natuerlik iëwige roem in ós Sjansemaekersriek!

Waat mótj gae hieväör doon? Op donderdig, as alle vraoge gewaes zeen, steurtj gae ‘nne mail mèt eur antjwaorde nao deslumstesjansemaeker@gmail.com. Lèt op! Vermeldj hie bie eure naam en tillefoonnummer en ’t adres of de locatie woea det gae zaoterdig te vinje zeetj. Zeetj gae van alle thoesspelers de slumste, den kome wae uch verrasse mèt geweldjige prieze! Zunjig zal de iërste vraog via de Facebook pagina, de website vanne Sjansemaekers en de website www.roggelsketeerke.nl gestèldj waere. Dus wie ze in good Roggels zègke: Stay tuned!