Väörstèlle kandidaat: Freek Vullers
De benjamin bie de kandidate is Freek Vullers. Hae mot nog 25 jaor waere. Freek is de zoon van Gerard Vullers en Resi van Rijt en woeantj op ’t Nieke. Freek is natuurlik ouch ‘nne echte vastelaovesveerder, missjien neet alle daag in Roggel. Pap rietj nog ‘ns aaf en toe mèt zien blauw böske op en neer nao Sjaen in Naer, mer wae höbbe Freek toch al ’n paar kiër zeen optraeje mèt ziene sax tiejes ’t Optochtmatinee, Boorebroelof en natuurlik ’t Joekse Jatse. Mèt ziene vrinjegroep ‘CV Kaetel’ doon ze al jaore mèt aan de optocht, mer om de koste ’n bietje te drökke, gaon ze ouch nao Naer en Egchel. In zien dagelijks laeve duit d’r, nao zien studie Mechatronica, bekkeriemesjiener teikene en programmere bie WP Haton in Panninge. ‘nne Topkandidaat, mer ouch de slumste Sjansemaeker?
