Op dit moment höbbe de meiste wirkendje ónger ós de vakantie achter de rök en zeen weer volop “aanne gang”. Jaomer genóg is meistal ’t vakantiegeveul nao ’n paar daag weer hiëlemaol weg. D’n eine is wiet weg gewaest en d’n angere in eige land, of zelfs gaaroets neet van hoes aaf gegange.
Zoea ouch bie ós. Allemaol det gedoons mèt die móndjkepkes en vaccinatiebewieze deje ós besloete óm mer gewuen aan toes te blieve. Hie get wanjele en inne stool ligke mèt ’n pilske kèn toch ouch hiël óntspannendj zeen? Wanjele doon wae gaer. Meistal gaon wae nao Kirkelkesberg, det liktdj dunbie en wat zeker zoea belangriek is, ’t is d’r meistal neet drök. Die drökdje is de raeje woearom wae zelje nao ’t Luedaal gaon wanjele, det is ós dök te drök.
Noe haje wae in ’t Luedaal waal de bördjes zeen staon van Water Wandel Wereld. Jao, wae kome d’r toch wal ‘ns, mer den is ’t meistal oppe fiets. Opgezocht op internet wat det beteikendje en de route door ’t Luedaal sprook ós wal aan. 2 groeate lussen, alles bie-ein óngeviër 15km, mer ja die drökdje he?
Dao waas opèns in de vakantie ‘nne maondjig mèt get slechter waer. Thijs Seelen zagd det ’t aaf en toe ’n klein buitje zooi kènne gaeve. Ouch de buienradar goof det beeldj weer. Noe zeen wae neet bang väör ein bietje raegen, slecht waer besteit neet, waal slechte kleijer. Dus wae gokdje d’r op det de meiste toeriste bènne zooie blieve en wae ’t Luedaal wal väör ós allein zoje höbbe. Helaas stónge d’r toch flink get auto’s op de parkeerplaats mer wie wae zoge wie drök ’t op ’t terras waas, móst ’t in de bos toch wal röstig zeen.
Dus wae op waeg op de Water Wanjelwaeg. En wat höbbe wae genaote! Van de röst, van de sjoean smaal paedjes, de Luebaek en de mäöle. Ouch de 2e lus richting de Busjop tuentj ein verassendj heide landsjap. Waat ‘n aafwisseling in landsjap op zón kort stökske wanjelroute. Bie de Busjop nateurlijk ff ‘n pilske wat d’r mètegang väör zorgdj det wae neet naat waere van ein van die aangekondigdje buitjes. Den geit ’t via de Bedeliër weer richting st. Elizabeth woea de auto d’r väör zorgdj det wae drueg aan toes kome. ‘Nne aanraojer dus. En zoea zuuse wal, doe hoofs neet wiet van hoes aaf te gaon óm te kènne genete van de sjoeane natuur. Op nao de volgendje Water Wandel Wereld.
